يوم ميلادك فى قلبى يا غالى

قبل اي حاجة حبى و اشتياقى ليك بيزيد ، زي النهارده من 74 سنة { 1934 } كان يوم ميلادك ياجميل ، وكان اخر مرة تسمع مننا كل سنة و انت طيب يا غالى كان 7-9-2006 وساعتها حبيبى كان بيقول النهارده تممت 72 سنة محدش يقول { ربنا يخليك او ربنا يديلك طولة العمر لاء ،قول ربنا يبارك لك ف عمرك }، ابى الغالى ،بعدها بشهرين يعنى ف 28-11-2006 ،سبتنا كلنا و ارتقيت للرفيق الاعلى اللى عز و جل كنت بتحبه اوى و كنت دايما تشكره ع نعمه علينا ،انا النهارده بأدعى لك تكون فى منزلة عالية و كبيرة عند ربنا سبحانه و تعالى ، و اطمئن علينا كلنا كويسين و الحمد لله و مفيش اى تطورات غير ان تامر ربنا رزقه بولد سماه سعود ، و بقية احفادك بيكبروا الحمد لله ، أنت وحشتنا كلنا اوى اوى
يا بابا.

اختراع

لما شفت ال فيزا كارت مع اول واحد من كام سنة قلت و لزمته ايه الدلع ده كل ده عشان مش عايز يشيل محفظة و فلوس !! وبعدين لما كل البنوك اللى اسماءها صعبة اوى دى كترت و فتحت فى وقت واحد، ولو اى حد يعدى ادامها تديى له الكارت السحرى و تسهيلات ايه مااقولكش ، و لما شفت كل المحلات و الهايبر شغالة بالماكينة السحرية لزوم الكارت السحرى لاحظت ان كل الناس شايلة كل الكروت بتاعة كل البنوك ، و خد من ده و سدد لده و مشيها ، ده سلو بلدنا كده ، لاء و قال ايه خللى بالك من تبييض البيض ، يا عم روووح ده احنا اللى دهناه دوكو مش غسلناه ، و ستـــــرك يا رب

21-08-2008

رحت لبتاع البقالة اللى جنب البيت قلت له من فضلك عايز 4كيس لبن و 5زبادى ، قال اتفضل ، قلت له الحساب كام ، قال لى16.25جنيه قلت له اتفضل ، وطلعت من عنده سرحت فى بلدنا و قلت آه لو كنا بلد زراعية وربنا عاطينا ميه حلوة و لا نيل مش كان حيبقى حالنا احسن ، يا الله الحمد لله لسه معايا بقية العشرين جنيه الحق اجيب لى نص رغيف عيش و زيتونة ، والمثل اللى بيقول (محدش بينام من غير عشا) ، ينســـــــــــى

الاتفاق الصعب

من اندر النوادر ان فيه حاجة يتفق عليها كل البشر من كل الفئات و الثقافات و اصحاب المهن المختلفة ، لكن أهو حصل و اتفقوا ،،، اتفقوا انهم تعبانين و مخنوقيين و متأكدين ان البيض الفاسد اختلط بالسليم و بوظه و اتعودوا على طعمه الفاسد و نسوا طعم البيض السليم ، و قالك زود الملح طعمه الحادق بيضيع اى حاجة،أهو بيض فى بيض

هو ايه النظام ؟

هو مش معنى النظام ان المنظمين الكبار يحطوا النظام اللى الباقيين يمشوا عليه و لا النظام ان يبقى فيه نظام من غير أى نظام أصلا